Árið í hnotskurn

Hér er stiklað á helstu viðburðum ársins 2023

16. janúar 2023

Viðskiptavinir Orku náttúrunnar ánægðastir allra á raforkumarkaði

Árið hófst með ánægjulegum fréttum þar sem tilkynnt var að viðskiptavinir Orku náttúrunnar væru ánægðastir allra á raforkumarkaði. Var þetta í fjórða árið í röð sem ON tók við Ánægjuvoginni. Þá var ON einnig hástökkvari ársins þegar horft er á öll fyrirtæki í öllum geirum á Íslandi.

31. janúar 2023

Frá alþjóðlegu lyfjafyrirtæki til Orku náttúrunnar

Árni Hrannar Haraldsson var ráðinn framkvæmdastjóri Orku náttúrunnar í lok janúar og hóf hann störf 1. maí.

2. febrúar 2023

Fyrsta umhverfismat sinnar tegundar á Íslandi

Skipulagsstofnun auglýsti í byrjun febrúar, umhverfismatsskýrslu Carbfix vegna umhverfismats niðurdælingar á CO2 til geymslu á Hellisheiði. Var það fyrsta umhverfismat sinnar tegundar á Íslandi.

3. febrúar 2023

Sævar Freyr stýrir Orkuveitunni

Það varð ljóst í febrúar að Sævar Freyr Þráinsson yrði nýr forstjóri Orkuveitunnar og tæki við þann 1. apríl af Bjarna Bjarnasyni sem hafði verið forstjóri í 12 ár.

14. mars 2023

Vaxtarsprotar Orkuveitunnar hljóta Menntasprotann 2023

Orkuveitan hlaut Menntasprotann árið 2023 fyrir verkefnið Vaxtarsprotar en verðlaunin voru afhent á Menntadegi atvinnulífsins. Verkefnið hefur það að markmiði að þróa vinnustaði Orkuveitunnar og breytta menningu til þess að takast betur á við síbreytilegt umhverfi og auknar kröfur og væntingar viðskiptavina.

22. mars 2023

Niðurdæling á CO2 og H2S hafin á Nesjavöllum

Ný tilraunastöð Carbfix til kolefnisföngunar og -förgunar við virkjun Orku náttúrunnar á Nesjavöllum var tekin í notkun í mars. Eitt af markmiðum verkefnisins er að leggja grunn að fullri hreinsun á CO2 og H2S frá Nesjavallavirkjun síðar meir. Verkefnið er þýðingarmikið skref að því marki að minnka enn frekar losun gróðurhúsalofttegunda frá jarðvarmavirkjunum sem er eitt af lykilverkefnum í loftslagsaðgerðum Íslands.

19. apríl 2023

Sólrún í stjórn Alþjóða jarðhitasambandsins (IGA)

Sólrún Kristjánsdóttir framkvæmdastýra Veitna var kosin í stjórn Alþjóða jarðhitasambandsins, IGA (International Geothermal Association). Hún mun sitja í stjórn félagsins næstu þrjú árin.

21. apríl 2023

Ísland leiðir í nýtingu ljósleiðara í Evrópu fjórða árið í röð

Ísland hélt enn og aftur toppsæti sínu sem það Evrópuland þar sem hæst hlutfall heimila nýtir sér ljósleiðaratengingu til að uppfylla gagnaflutningsþörf heimilisins.

3. maí 2023

60 Minutes fjallar um kolefnisbindingu Carbfix

60 Minutes, vinsælasti fréttaþáttur Bandaríkjanna, fjallaði um aðferð Carbfix til kolefnisbindingar á CBS sjónvarpsstöðinni. Fréttamaðurinn Bill Whitaker heimsótti Hellisheiðarvirkjun þar sem þau Sandra Ósk Snæbjörnsdóttir og Kári Helgason ræddu við hann og útskýrðu tæknina.

26. maí 2023

Hreinsun á Nesjavallaæð

Nesjavallaæð var hreinsuð í júní en hún var síðast hreinsuð fyrir tuttugu árum síðan. Tilgangurinn með hreinsuninni var að auka afkafstagetu æðarinnar en Nesjavallaæðin er ein af megin flutningsleiðum á heitu vatni til höfuðborgarsvæðisins.

16. júní 2023

Hraðhleðslustöð við þitt fyrirtæki

Orka náttúrunnar fjölgaði bæði hverfahleðslum og hraðhleðslustöðvum á árinu og hefur fyrirtækið verið leiðandi í orkuskiptum frá upphafi. Í þeim tilgangi að fá enn fleiri í lið með sér hóf ON að bjóða áhugasömum fyrirtækjum að setja upp hraðhleðslustöðvar á lóðum sínum.

20. júní 2023

ON selur 28 MW til landeldisstöðvar í Þorlákshöfn

Orka náttúrunnar og landeldisfyrirtækið GeoSalmo undirrituðu raforkusamning um kaup á allt að 28 MW af raforku sem nýtt verður til landeldisstöðvar við Þorlákshöfn.

26. júní 2023

Mælar í hleðslustöðvum ON uppfylla kröfur

Orkustofnun komst að þeirri ánægjulegu niðurstöðu fyrir ON að mælar í hleðslustöðvum fyrirtækisins fyrir rafbíla standast kröfur en óvissa hafði ríkt um málið.

28. júní 2023

Orkuveitan skoðar að reisa vindorkugarða í nágrenni Hellisheiðar

Orkuveitan lagði inn beiðni til Orkustofnunar um að verkefnisstjórn rammaáætlunar fjalli um þrjá vindorkukosti í nágrenni Hellisheiðar.

30. júní 2023

ON og Carbfix stíga mikilvæg skref í átt að sporleysi Hellisheiðarvirkjunar

Edda Sif Pind Aradóttir, framkvæmdastýra Carbfix og Árni Hrannar Haraldsson framkvæmdastjóri Orku Náttúrunnar tóku fyrstu skóflustungu að nýrri hreinsistöð, sem mun bera heitið Steingerður. Með tilkomu hennar tekst að fanga nær allt koldíoxíð og brennisteinsvetni frá Hellisheiðarvirkjun.

10. júlí 2023

Orkuveitan hlýtur staðfestingu á loftslagsmarkmiðum

Orkuveitan fékk staðfestingu frá Science Based Targets initiative (SBTi) um að loftslagsmarkmið samstæðunnar byggi á vísindalegum grunni og styðji við aðgerðir Parísarsáttmálans um að halda hlýnun jarðar innan við 1,5°C.

11. ágúst 2023

Carbfix og samstarfsaðilar hljóta styrk frá bandarískum stjórnvöldum

Samstarfsverkefni þrettán aðila undir forystu Carbfix, RMI og Pacific Northwest National Laboratory (PNNL) hlutu styrk frá bandaríska orkumálaráðuneytinu til að þróa verkefni um föngun kolefnis úr andrúmslofti og bindingu þess í jarðlögum í norðvesturhluta Bandaríkjanna. Styrkurinn nemur þremur milljónum dollara.

31. ágúst 2023

Nýr framkvæmdastjóri Ljósleiðarans

Einar Þórarinsson var ráðinn nýr framkvæmdastjóri Ljósleiðarans í lok sumars. Einar sem býr yfir rúmlega tuttugu ára reynslu sem stjórnandi kom til félagsins frá Sidekick Health en þar áður starfaði hann m.a. hjá Advania og Vodafone.

13. september 2023

Ljósleiðarinn býður TÍU GÍG til framtíðar

Öllum þeim sem tengst geta Ljósleiðaranum gafst tækifæri til að tífalda hraða sinn frá og með október þegar hámarkshraði varð 10 gígabitar í stað 1 áður. Ljósleiðarinn horfir til framtíðar og undirbýr heimilin í landinu fyrir þá þróun sem er að eiga sér stað.

15. september 2023

Hlutafjáraukning samþykkt og umboð veitt

Hluthafar Ljósleiðarans efh. samþykktu á hluthafafundi að hækka hlutafé í félaginu um sem svarar þriðjungi hlutafjár félagsins eftir hækkunina.

26. september 2023

Mikilvægur áfangi í orkuskiptasögu Íslands

Í september var skemmtiferðaskip landtengt í Reykjavík í fyrsta sinn. Veitur lögðu rafstrenginn fyrir Faxaflóahafnir og tengingin getur þjónað tveimur skipum á sama tíma.

28. september 2023

Samkeppniseftirlitið heimilar kaup Ljósleiðarans á stofnneti Sýnar

Kaup Ljósleiðarans ehf. á stofnneti Sýnar hf. voru samþykkt án skilyrða og samhliða kaupsamningi var gerður þjónustusamningur milli félaganna til 12 ára.

17. október 2022

Orkuveitan hlýtur alþjóðleg verðlaun fyrir árangur í að jafna laun kynjanna

Orkuveitan var verðlaunuð af samtökunum Rise & Lead Women fyrir árangur sinn í að jafna launamun kynjanna. Ellen Ýr Aðalsteinsdóttir framkvæmdastýra Mannauðs og menningar tók við verðlaununum við hátíðlega athöfn í Haag.

4. október 2023

Carbfix hlaut norrænu Blaze-verðlaunin

Carbfix hlaut norrænu Blaze-jafnréttisverðlaunin í flokknum „Guardian“ en verðlaunin eru veitt fyrirtækjum eða einstaklingum sem vinna að sjálfbærni, loftslagsmálum og umhverfisvernd með áherslu á tengsl fjölbreytileika, inngildingar og loftslagsverndar.

5. október 2023

Sumarstarfsfólk Landgræðslu ON gróðursetti 10 hektara af landi

Í ár græddi og gróðursetti sumarstarfsfólk Landgræðslu ON 10 hektara af landi, sem samsvarar bindingu 31,22 tonna C02 á ári!

13. október 2023

Orkuveitan, Veitur og Ljósleiðarinn hljóta Jafnréttisvogina í ár

Orkuveitan, Ljósleiðarinn og Veitur hlutu Jafnvægisvogina, viðurkenningu frá Félagi kvenna í atvinnurekstri, fyrir að hafa náð árangri í að jafna kynjahlutfall einstaklinga í stjórnunarstöðum. Viðurkenningarnar voru veittar á ráðstefnu sem bar yfirskriftina „Við töpum á einsleitninni – Jafnrétti er ákvörðun“.

20. október 2023

Veitur með hæstu einkunn um ákvörðunarvald og ábyrgð kvenna

Konur í orkumálum (KÍO) gáfu út fjórðu skýrsluna um stöðu kvenna innan íslenska orku- og veitugeirans. Þar kom fram að Veitur væru með hæstu einkunn úrtaksins eða 71,1%.

3. nóvember 2023

Carbfix hefur prófanir á kolefnisbindingu með sjó - nýmæli á heimsvísu

Stór tímamót urðu hjá Carbfix þegar tilraunir hófust í Helguvík með að nýta sjó í stað ferskvatns til varanlegrar bindingar koldíoxíðs (CO2) í berglögum. Tilraunin er nýmæli á heimsvísu og mikilvægt skref í framþróun tækni til kolefnisbindingar.

8. nóvember 2023

Forvitnishorn Jarðhitasýningarinnar opnað

Forvitnishorn Jarðhitasýningar Orku Náttúrunnar var opnað með pompi og prakt í lok október en Forvitnishornið er fræðslurými fyrir börn á öllum aldri.

16. nóvember 2023

Edda Aradóttir framkvæmdastýra Carbfix á lista TIME yfir 100 áhrifamestu viðskiptaleiðtoga á sviði loftslagsmála

Tímaritið TIME hefur í fyrsta sinn birt lista yfir 100 áhrifamestu viðskiptaleiðtoga heims á sviði loftslagsmála, en þeirra á meðal er Edda Aradóttir, framkvæmdastýra Carbfix.

21. nóvember 2023

Evrópuráðið verðlaunar Ljósleiðarann

Ljósleiðarinn fékk verðlaun Evrópuráðsins sem bera heitið European Broadband Awards fyrir árið 2023. Verðlaunin fékk Ljósleiðarinn fyrir verkefnið „Kapphlaupið gegn Fagradalsfjalli“ sem unnið var þegar eldgos hófst við Fagradalsfjall vorið 2021. Axel Paul Gunnarsson tók við verðlaunum við hátíðlega athöfn í Brussel.

24. nóvember 2023

ON og Thor Landeldi gera samning um kaup á 5 MW af raforku til laxeldis

Orka náttúrunnar og Thor Landeldi ehf. undirrituðu raforkusamning sem tryggir Thor Landeldi ehf. 5 MW af raforku. Thor Landeldi er með í undirbúningi laxeldi í grennd við Þorlákshöfn.

24. nóvember 2023

Þrjátíu fengu styrki úr Vísindasjóði Orkuveitunnar

Úthlutað var úr Vísindasjóði Orkuveitunnar, VOR, í nóvember þegar þrjátíu verkefni hlutu styrk. Hundrað milljónum og fimmhundruð þúsundum var úthlutað við hátíðlega athöfn sem fram fór í Elliðaárstöð.

24. nóvember 2023

Forsetahjónin kíktu í Elliðaárstöð Orkuveitunnar

Forsetahjónin Guðni Th. Jóhannesson og Eliza Reid komu í heimsókn í Orkuveituna þann 23. nóvember, ásamt borgarstjóra, Degi B. Eggertssyni og eiginkonu hans, Örnu Dögg Einarsdóttur. Tilefnið var opinber heimsókn forsetahjónanna til Reykjavíkur.

28. nóvember 2023

Orkuveitan og Ölfus í samstarf um nýtingu jarðhita

Orkuveitan, sveitarfélagið Ölfus og Títan tilkynntu á sameiginlegum fundi um áform um að sækja sameiginlega um rannsóknarleyfi með samstarf um nýtingu jarðhita í Ölfusdal í huga. Þá var einnig skrifað undir viljayfirlýsingu milli Orkuveitunnar og sveitarfélagsins Ölfuss.

14. desember 2023

Orkuveitan sækir um leyfi til rannsókna á jarðhita í Meitlum og Hverahlíð II

Orkuveitan sótti um rannsóknarleyfi til Orkustofnunar til rannsókna á jarðhita í Meitlum og Hverahlíð II til 10 ára. Þörf er á frekari orkuvinnslu í Hengli á næstu áratugum, bæði til að mæta sívaxandi eftirspurn eftir heitu vatni og til að viðhalda og jafnvel auka rafmagnsframleiðslu.

22. desember 2023

Veitur fá nýtingarleyfi

Í lok árs fengu Veitur nýtingarleyfi frá Orkustofnun á jarðhita á Bakka og Hjallakrók í sveitarfélaginu Ölfusi. Vaxandi eftirspurn hefur verið í Ölfusi eftir heitu vatni og er nauðsynlegt að Veitur geti sinnt sinni lögbundnu skyldu og tryggi enn frekar nægjanlegt vatn til hitaveitu.